Föstudaginn 7 maí kl. 17:15 verður aðalfundur Félagsfræðingafélags Íslands haldinn á Bifröst. 
Þetta sama kvöld verður hátíðarkvöldverður sem allir geta tekið þátt í hvort sem þeir mæta á ráðstefnuna eða bara á aðalfundinn.

Aðalfundir félagsfræðingafélags Íslands verður föstudaginn 7. maí næstkonandi kl 17:15. Að þessu sinni verður aðalfundurinn haldinn að Bifröst samhliða ráðstefnu um íslenska þjóðsfélagsfræði.

Nánari upplýsingar um ráðstefnuna má finna hér:

http://www.bifrost.is/islenska/um-haskolann/frettir/nr/99455/

Um leið og stjórn félagsins hvetur félagsmenn til að sækja ráðstefnuna þá er rétt að geta þess að aðalfundur er öllum félagsmönnum opinn óháð því hvort þeir sækja ráðstefnuna eða ekki.

Dagskrá aðalfundar er eftirfarandi:

1.       Skýrsla fráfarandi stjórnar
2.       Endurskoðaðir reikningar lagðir fram til afgreiðslu
3.       Lagabreytingar. Lagðar eru til eftirfarandi breytingar á lögum félagsins
a.       Lagðar eru til breytingar á 2. gr. laga Félagsfræðingafélags Íslands. Núverandi grein er svohljóðandi: Tilgangur félagsins er að efla fræðilega umræðu meðal félagsmanna; hafa áhrif á almenna umræðu um þjóðfélagsmál og standa að ráðstefnum og fyrirlestrum um félagsfræðileg málefni. Lagt er til að hún verði svohljóðandi: Tilgangur félagsins er að efla fræðilega umræðu meðal félagsmanna; hafa áhrif á almenna umræðu um þjóðfélagsmál og standa að ráðstefnum og fyrirlestrum um félagsfræðileg málefni. Félagið stendur jafnframt að útgáfu fagtímarits samkvæmt samningi þar að lútandi.
b.      Lagðar eru til breytingar á 9. gr. laga Félagsfræðingafélags Íslands. Núverandi grein er svohljóðandi: Félagið er aðili að Samtökum norrænna félagsfræðinga og annast öll samskipti við þau félög (þar á meðal ritstjórn Acta Sociologica). Lagt er til að hún verði svohljóðandi: Félagið er aðili að Samtökum norrænna félagsfræðinga og annast öll samskipti við þau félög samkvæmt reglum þar að lútandi.  
4.       Kosnin stjórnar og skoðunarmanna reikninga.
5.       Kosning fulltrúa í Samband norrænna félagsfræðinga.
6.       Félagsgjald.
a.       Lagt er til að félagsgjald verði hækkað úr 3.000 kr. Í 3.600 kr. á ári.
7.       Önnur mál.
a.       Á síðasta misseri hefur nokkuð verið rætt um það hvaða tungumál skal nota í norrænu samstarfi og gerði Félagsfræðingafélag Íslands í samstarfi við núverandi fulltrúa félagsins í Sambandi norrænna félagsfræðinga því könnun þar sem viðhorf félagsmanna og tungumálakunnátta voru skoðuð. Á fundinum mun Margrét Valdimarsdóttir kynna niðurstöður könnunarinnar og í framhaldinu kallar stjórnin eftir umræðu um þetta málefni.
b.      Nú liggur fyrir að Ísland tekur við formennsku í Sambandi norrænna félagsfræðinga á næsta ári. Í framhaldi verður ráðstefna Norrænna félagsfræðinga haldin hér á landi árið 2013. Þetta krefst nokkurs undirbúnings og hvetur stjórnin alla þá sem hafa áhuga á að taka þátt í þessu starfi að mæta á aðalfundinn og taka þátt í umræðum um væntanlegt skipulag.

Miðvikudaginn 6. maí hélt Félagsfræðingafélag Íslands málþing um samfélagslegar afleiðingar fjármálakreppunnar. Fyrirlesarar fjölluðu um afleiðingar kreppunnar á einstaklinga og samfélagið í heild sinni.

Stefán Ólafsson prófessor í félagsfræði fjallaði um stöðu Íslands í  alþjóðlegum samanburði og setti þjóðfélagslegar afleiðingar kreppunnar í samhengi. Hann fjallaði um áhrif hennar á atvinnuleysi, kaupmáttarrýrnun, landsflótta og ekki síst á aukna skuldabyrði heimilanna og þjóðfélagsbreytingar. Fyrirlestur Stefáns má nálgast hér.

Jón Gunnar Bernburg dósent í félagsfræði fjallaði um niðurstöður rannsókna á áhrifum efnahagslegra erfiðleika á íslensk ungmenni. Jón Gunnar hefur skoðað annars vegar bein áhrif fátæktar á unglinga sem búa við erfiðar aðstæður á heimilum sínum. Hins vegar hefur hann skoðað óbein áhrif efnahagslegra erfiðleika í gegnum nærumhverfið. Fyrirlestur Jóns Gunnars má nálgast hér.

Bryndís Ísfold formaður Jafnréttisvaktarinnar ræddi um frumniðurstöður vaktarinnar. Hún beindi sjónum að atvinnuástandi karla og kvenna og hvaða þætti þarf að styrkja til að stuðla að jafnrétti kynjanna.  Fyrirlestur Bryndísar má nálgast hér.

Félagsfræðingafélag Íslands þakkar fyrirlesurum og ekki síst þeim fjölmörgu gestum sem tóku þátt. Nánari upplýsingar um málþingið má nálgast hér.

Félagsfræðingafélag Íslands hélt málþing þann 4. desember 2008 á Grand Hótel í Reykjavík undir yfirskriftinni Fangelsi á Íslandi, betrun eða biðstöð?

Á málþinginu kynnti Helgi Gunnlaugsson niðurstöður rannsókna sinna á ítrekun brota og menntun fanga. Fram kom að þegar menntun fanga á Íslandi er borin saman við hin Norðurlöndin þá virðist meiri pólarisering í menntunarstöðu fanga hér á landi þar sem hlutfall þeirra sem ekki hafa lokið neinu námi er frekar hátt meðal fanga hér á landi og að sama skapi hlutfall þeirra sem hafa lokið háskólaprófi. Erlendur S. Baldursson kom inn á það í erindi sínu að líklega væri þetta vegna þess að hér á landi fer lægra hlutfall brotamanna í fangelsi og þá helst erfiðasti hópurinn.

Oddur Malmberg kynnti á ráðstefnunni niðurstöður MA rannsóknar sinnar á síbrotamönnum sem sátu á Litla-Hrauni. Fram kom að þessir menn höfðu margir hverjir misst alla trú á áfengis- og vímuefnameðferð og höfðu jafnvel litla löngun til að hætta neyslu enda sumir hverjir farnir að líta á neysluna sem lífsstíl.

Að framsöguerindum loknum tóku, auk fyrirlesara, þau Hallgrímur Einar Hannesson, Margrét Frímannsdóttir og Stefán Eiríksson, þátt í pallborðsumræðum undir stjórn Karls Blöndal. Þar kom fram að margt hefur breyst til hins betra í þessum efnum hér á landi en þó má ekki líta svo á að þessu verkefni sé á einvern hátt lokið. Stjórn Félagsfræðingafélagsins þakkar fyrirlesurum, þátttakendum í pallborði og ráðstefnugestum öllum fyrir þátttökuna og fróðleg skoðanaskipti.

Nánari upplýsingar um málþingið og slæður fyrirlesara má nálgast hér.

Félagsfræðingafélag Íslands stendur fyrir málþingi um samfélagslegar afleiðingar fjármálakreppu miðvikudaginn 6. maí á Grand Hótel. Erindi flytja Stefán Ólafsson, Jón Gunnar Bernburg og Bryndís Ísfold. Nánari upplýsingar um dagskrá ráðstefnunnar má finna hér.

Ingólfur V. Gíslason, lektor í félagsfræði við Háskóla Íslands, hélt nýlega fyrirlestur um samskipti karla og kvenna í fjölskyldum nútímans. Um var að ræða síðasta erindið í fyrirlestraröð jafnréttisnefndar Háskóla Íslands um fjölskyldumál og jafnrétti.

Í erindi Ingólfs kom m.a. annars fram að samskipti kynjanna í sambúð og hjónabandi hafa þróast frá niðurnegldum hlutverkum byggðum á hefð til (takmarkaðra) samninga um verkaskiptingu. Þannig var fram undir 1970 almennt litið svo á að heimilisverkin væru í verkahring konunnar enda hlutverk konunnar að vera húsmóðir. Eftir 1970 fóru karlmenn hins vegar að taka aukinn þátt í heimilisstörfum og barnauppeldi en þá oftast undir stjórn konunnar. Á síðustu árum hafa hins vegar orðið breytingar á þessu þar sem karlar og konur semja í auknum mæli um heimilisstörfin, ráða t.d. aðra til að sinna þeim eða skipta þeim jafnar með sér. Slæður úr fyrirlestri Ingólfs má nálgast hér.

Aðalfundur Félagsfræðingafélagsins var haldinn nýlega. Á fundinum var skýrsla fráfarandi stjórnar kynnt.

Opinber fyrirlestur prófessors Veli-Matti Ritakallio á vegum Þjóðmálastofnunar Háskóla Íslands

Nýlega luku Harpa Njáls og Þórdís Rún Þórisdóttir við verkefnið „Sociologprofiler i Norden“. Verkefnið var unnið af frumkvæði Félagsfræðingafélags Norðurlanda (NSF), í Danmörku, Svíþjóð, Noregi, Finnlandi og Íslandi 2007-2008. Markmiðið er að vekja athygli á margbreytilegum störfum og möguleikum félagsfræðinga.